স্বরূপ! ভবতো ভবত্বয়মিতি স্মিত-স্নিগ্ধয়া

 স্বরূপ! ভবতো ভবত্বয়মিতি স্মিত-স্নিগ্ধয়া

গিরৈব রঘুনাথমুৎপুলকিগাত্রমুল্লাসয়ন্।

রহস্যুপদিশন্নিজ প্রণয়-গূঢ়-মুদ্রাং স্বয়ং

বিরাজতু চিরায় মে হৃদি স গৌরচন্দ্রঃ প্রভুঃ॥১॥

স্বরূপ! মম হৃণং বত! বিবেদ রূপঃ কথং

লিলেখ যদয়ং পঠ ত্বমপি তালপত্রেহক্ষরম্।

ইতি প্রণয়-বেল্লিতং বিদধদাশু রূপান্তরং

বিরাজতু চিরায় মে হৃদি স গৌরচন্দ্রঃ প্রভুঃ॥২॥

স্বরূপ! পরকীয়-সৎপ্রবর-বস্তু-নাশেচ্ছতাং

দধজ্জন ইহ ত্বয়া পরিচিতো নবেতীক্ষয়ন।

সনাতনমুদিত্য বস্মিতমুখং মহাবিস্মিতং

বিরাজতু চিরায় মে হৃদি স গৌরচন্দ্রঃ প্রভুঃ॥৩॥

স্বরূপ! হরিনাম যজ্জগদঘোষয়ং তেন কিং

ন বাচয়িতুমপ্যথাশকমিমং শিবানন্দজম্।

ইতি স্বপদ-লেহনৈঃ শিশুমচীকরৎ যং কবিং

বিরাজতু চিরায় মে হৃদি স গৌরচন্দ্রঃ প্রভঃ॥৪॥

স্বরূপ! রসরীতিরম্বুজদৃশাং ব্রজে ভন্যতাং

ঘন-প্রণয়-মানজা শ্রুতিযুগং মমোৎকণ্ঠতে । 

রমা যদিহ মানিনী তদপি লোকয়েতি ব্রুবন

বিরাজতু চিরায় মে হৃদি স গৌরচন্দ্রঃ প্রভুঃ॥৫॥

স্বরূপ! রস-মন্দিরং ভবসি মন্মুদামাস্পদং

ত্বমত্র পুরুষোত্তমে ব্রজভুবীব মে বর্তসে।

ইতি স্বপরিরম্ভণৈঃ পুলকিনং ব্যধাৎ তঞ্চ যো

বিরাজতু চিরায় মে হৃদি স গৌরচন্দ্রঃ প্রভুঃ॥৬॥

স্বরূপ! কিমপীক্ষিতং কনু বিভো! নিশি স্বপ্নতঃ

প্রভো! কথয় কিন্নু তন্নবযুবা বরাম্ভোধরঃ।

ব্যধাৎ কিময়মীক্ষ্যতে কিমু ন হীত্যগাৎ তাং দশাং

বিরাজতু চিরায় মে হৃদি স গৌরচন্দ্রঃ প্রভুঃ॥৭॥

স্বরূপ! মম নেত্রয়োঃ পুরত এব কৃষ্ণো হস-

ন্নপৈতি ন করগ্রহং বত! দদাতি হা! কিং সখে!

ইতি স্থলতি ধাবতি শ্বসিতি ঘূর্ণতে যঃ সদা

বিরাজতু চিরায় মে হৃদি স গৌরচন্দ্রঃ প্রভুঃ॥৮॥

স্বরূপ-চরিতামৃতং কিল মহাপ্রভোরষ্টকং

রহস্যতমমদ্ভুতং পঠতি যঃ কৃতী প্রত্যহম্।

স্বরূপ-পরিবারতাং নয়তি তং শচীনন্দনো

ঘন-প্রণয়-মাধুরীং স্বপদয়ো সমাস্বাদয়ন॥৯॥